Йошкар-Олана Россий кӱкшытан «Пеледыш пайремым» палемдыш

Йошкар-Олана Россий кӱкшытан «Пеледыш пайремым» палемдыш
              Кодшо шуматкечын Йошкар-Олана Россий кӱкшытан «Пеледыш пайремым» палемдыш. Рӱдӧ олашкына республикысе чыла район да ола гыч, Российын моло кундемлаже гыч ятыр уна- влак толыныт. Пайремын ик тӱҥ площадкыже Ленин лӱмеш площадь ыле. Погынышо калыкым Марий Элым вуйлатыше Юрий Зайцев саламлыш. Тудо палемдыш: «Пеледыш пайрем» марий мландыште илыше, марий тӱвырам йӧратыше, тыглай пашаче еҥлан эре калык пайрем лийын.  Тений пайрем Россий Президентын увертарыме Ешын талукшылан пӧлеклалтеш. Погынышо- влакым тыгак Кугыжаныш Погыным вуйлатыше Анатолий Смирнов, Кугыжаныш Думын депутатше Сергей Казанков, Тӱҥ марий карт Александр Таныгин, Мер каҥашым вуйлатыше Эдуард Александров саламлышт Пайрем программым 50 усталык коллектив сӧрастарыш. Торжественный ужашым иктешлышыла Юрий Зайцев награде- влакым кучыктыш. «Россий Федераций ял озанлыкын сулло пашаеҥже» чап лӱмым «Шойбулак» племзаводын тракторист- машинистше Леонид Соколовлан пуымо. Марий Эл Правительствын Чап грамотыжым У Торъял районысо «Первый май» озанлыкын тӱҥ агрономжо Анатолий Курбатовлан кучыктымо. Марий Элым вуйлатышын тауштымашыжым Параньга районысо «Победа» ял озанлык кооперативын тракторист-машинистше Сергей Тасаевлан увертарыме. Шошо ага пашаште ойыртемалтше- влакым тыгак ял озанлык министр Андрей Кондратенко саламлыш.
             Фото: Марий Элым вуйлатышын  администрацийжын увер дене пашам ыштыше пӧлкаже.

Прошлые выпуски