Марий ийше- влак Волжскышто эртыше таҥасымашыште чыла гаяк шӧртньӧ медальым налын пытареныт
Марий ийше- влак Волжскышто эртыше таҥасымашыште чыла гаяк шӧртньӧ медальым налын пытареныт. Пушкольмо дене куымо базыште байдарка да каноэ дене куымо республикын чемпионат ден Первенствыже эртен. Куликово ерыште Российын вич регионжо гыч спортсмен- влак вашлийыныт: Марий Эл, Татарстан, Чуваший, Мордовоий да Ульяновск область гыч. Республикысе байдарка да каноэ дене куымо Федерацийын официальный лаштыкыштыже увертарыме почеш Марий Эл гыч спортсмен- влак чемпионатыште чапле лектышым ончыктеныт- модмо 15 комплект медаль гыч мемнан спортсмен- влак 13 дистанцийыште сеҥеныт. Вӱдышкӧ опытан спортсмен- влакат, самырык- шамычат лектыныт. Таҥасымаште Россий сборныйын тӱҥ составшын еҥже, Российын спорт мастерже Артём Коровинат лийын. Тудын копилкышкыже тиде таҥасымаш эше кум шӧртньӧ медальым конден. Таҥасымашым почмашке Волжск олан мэрже Рафис Шагвалеев миен. Ӱдыр-рвезе- влакым республикын сулло тренерже Евгений Мещеряков шуара.
Фото: ВК вотышто Байдарка да каноэ дене куымаш» тӱшка.
Фото: ВК вотышто Байдарка да каноэ дене куымаш» тӱшка.
