Марий Элыште 25 земский туныктышо ялыш кая
Марий Элыште 25 земский туныктышо ялыш кая. Тений республикыштына «Земский туныктышо» программым шыҥдараш 25 миллион теҥгем ойырымо. Тудын кугу ужашыже федерал бюджет гыч толеш. Республикысе туныктыш да шанче министерствын приказше почеш школласе вакантный должность- влакын перечньыштым пеҥгыдемдыме. Яра верыш пашаш толыт гын, ик гана тӱлымӧ компенсаций окса пуалтеш. «Земский учитель» порталыште 109 вакансийым вераҥдыме. Министерствыш тичмаш налмаште претендент- влак деч 43 йодмаш пурен. Конкурс комиссий 25 сеҥышым ойырен налын. Нуно Курык марий, Звенигово, Марий Турек, Медведево, Морко, Оршанке, Советский районлашке да Козьмодемьянскыш пашам ышташ каят. Нунылан ик миллион теҥге гыч тӱлымӧ лиеш. Ушештарена: «Земский учитель» программе 2020-шо ий гыч шыҥдаралтеш. 2020-шо ийыште 13 квотым ойырымо, вес ийын 12-ым, 2022-шо ийыште-11, 23-шо ийыште-15, тений 25-ытым.
