Йошкар-Олаште аварийный пӧртла гыч калыкым кусарыме кугу программым пеҥгыдемдыме

Йошкар-Олаште аварийный пӧртла гыч калыкым кусарыме кугу программым пеҥгыдемдыме
             Йошкар-Олаште кумдыклам комплексно вияҥдыме кышкарыште аварийный пӧртла гыч калыкым кусарыме кугу программым пеҥгыдемдыме. Тидын шотышто кок пунчалым Йошкар-Олан администрацийже савыктен. Тичмаш налмаште шуко пачеран 20 пӧрт гыч еҥ- влакым кусарат. Тушто 526 еҥ ила. Ярсыше мланде участкылаште 20 тӱжемат шӱдӧ квадрат метр деч шагал огыл илыме верым чоҥат.
               Икымше пунчалыш вич кумдыкым вияҥдымаш пура. Тушто шуко пачеран 18 пӧртым рончыман. Тушто 465 еҥ ила. Икымше кумдыкыш «Октябрьский» микрорайонысо 14 пӧрт, кокымшо кумдыкыш «Машиностроитель» микрорайонысо ик пӧрт, кумшо кумдыкыш «Кировец» гараж кооператив кундемысе ик пӧрт, нылымше кумдыкыш 15-ше школ турасе ик пӧрт, визымше кумдыкыш 4-ше номеран монча кундемысе ик пӧрт пурат. Визыт гыч ныл кумыдкыштыжо шуко пачашан пӧрт- влак чоҥалтыт, кумшо кумдыкышто тӱҥ шотышто гараж- влак чоҥалтшаш улыт. Кугу проектым шыҥдарыме  жапым 2035-ше ийын 31-ше декабрь марте палемдыме.
             Кокымшо пунчалже кок участкыште кок пӧртым кораҥдаш палемда. Тушто 61 еҥ ила. Икымше кумдыкшо-  шымше школ ден ончычсо йолчием фабрике коклаште ик пӧрт. Кокымшо кумдыкшо - «Мир тканей» ужалкалыме рӱдер ваштареш аптеке воктене улшо пӧрт. Кок вережат шуко пачашан пӧрт нӧлталтшаш. Нуным 2030-шо ийын 31-ше декабрь марте чоҥышаш улыт.
           Фото: Павел Стариков.

Прошлые выпуски