Йошкар-Олаште робототехнике дене интеллектуал олимпиаде эртен
Йошкар-Олаште робототехнике дене интеллектуал олимпиаде эртен. Юл кундем федерал округын интеллектуал олимпиадыжын регионысо йыжыҥже «Робототехнике» дене тӱҥалын. Ойырен налме таҥасымашыже- влак Бауман лицейысе «Кванториум» йоча технопаркын площадкыштыже эртеныт. Республикысе 12 район ден олала гыч 13 команде лийын. Ӱдыр-рвезе- влак роботым ыштышаш да тудым «Мемо» ден «Уремысе сӱретче» таҥасымашлаште шындыме задачым шке семын шукташ программироватлышаш улыт ыле. Сеҥышыш «Инфотех» лицейын командыже лектын. Тудын радамыште Дмитрий Катягин ден Тимофей Еренков улыт. Призан вер- влакым тыгак Козьмодемьянскысе 3-шо школын командыже- Егор Мурзаев, Сергей Алексеев, да Волжск оласе лицейын командыже- Егор Денисов ден Данил Адаев налыныт. Туныктыш министерствын ушештарымыже почеш, интеллектуал олимпиадын регионысо йыжыҥже 17-ше февраль гыч 13-шо март марте шуйна. Тудын лектышыже почеш командым чумырат. Тудыжо округысо йыжыҥыште республикын чапшым 12-шо-14-ше апрельыште Пермь олаште аралаш тӱҥалеш.
Фото: Туныктыш министерстве.
Фото: Туныктыш министерстве.
