Йошкар-Олаште уэш ял озанлык ярминга- влакым эртараш тӱҥалыт
Йошкар-Олаште уэш ял озанлык ярминга- влакым эртараш тӱҥалыт. Шушаш шуматкечын Чарла кремльыш оласе калыкым да уна- влакым ял озанлык кочкыш- сатум налаш ӱжыт. Ял озанлык министерствын увертарымыже почеш, тушто шылым, шӧрым да шӧр продуктым, чыве да пулдырчо муным, мӱйым да мӱкш сатум, киндым да кондитер сатум, пареҥгым, саскам да емыжым, чодыра сийым да сувенирым налаш лиеш. Ярминга 9 гыч 15 шагат марте пашам ышта. А сентябрьыште тыгай ярмингам 10-шо да 24-ше числаште эртараш палемдыме.
