Чодыра пожарын шарлымыжым чарен шогалтыме
Марий Эл ден Угарман область коклаште чодыра пожарын шарлымыжым чарен шогалтыме. Кызыт марте тудо республикысе 700 гектар чодырам авалтен ыле. Ял- влаклан лӱдыкшӧ уке. Тидын нерген оперативный совещанийыште Марий Элым вуйлатышын пашажым шуктышылан пӱртӱс поянлык министр Алексей Киселёв увертарен. Юрий Зайцев палемден: калык дене пашам ыштыман: манеш-манеш, лӱдыкшӧ нерген кугемден ойлымо ынже шарле манын, чын увер дене палдарен шогыман. Республикыште кызыт пожар ваштареш виктаралтше посна режим кучалтеш. Тудын годым чодыраш кошташ, тулым ылыжташ ок лий. Юрино район администрацийым вуйлатыше Марина Шихован мутшо почеш, верысе калык чыла умылен вашлийын, умылтарыме паша чарныде шукталтеш. Юрий Зайцев ешарен: тора кундемлаште ӱшанле телефон да интернет кылым ышташ оборудованийым налаш да вераҥдаш кӱштен.
Фото: Марий Элым вуйлатышын организаций да аналитик виктемже.
Фото: Марий Элым вуйлатышын организаций да аналитик виктемже.
