Таче Россий Федерацийын Кугыжаныш тистыжын кечыже палемдалтеш

          Таче Россий Федерацийын Кугыжаныш тистыжын кечыже палемдалтеш. Тудым 1994-ше ий 20-шо августышто Россий Президентын Указше дене пеҥгыдемдыме. 1991-ше ийын 22-шо августышто Москосо Ош Пӧрт ӱмбалне икымше гана Российын кум тӱсан тистыжым нӧлталме. Тудо сорла да чӧгытан йошкар тистым алмаштен. Ынде кум тӱсан тисте официальный кугыжаныш символлан шотлалтеш. Тыге шотлат: икымше гана ош-канде йошкар тӱсан тистым Алексей Михайловичын кугыжа улмыжо годым 1667-ше 1669-ше ийлаште чоҥымо «Орёл» сарзе корабльыште нӧлталме. А тистын законло «ачажлан» Пётр Первый шотлалтеш. 1705-ше ийын 31-ше январьыште тудо Указым луктын. Тудын дене келшышын чыла суднышто ош-канде-йошкар тистым нӧлталшаш улыт. Тудо шкеак флагым сӱретлен да тӱс- влакын радамыштым палемден. Тисте официальный статусым 1896-шо ийыште гына налын. Тунам Николай 2-ойым короноватлыме вашеш юстиций министерстве рашемден: калыкле тисте семын ош-канде-йошкар тисте гына шотлалтеш.
            Марий Элым вуйлатышын пашажым шуктышо Юрий Зайцев Республикысе калыкым Россий Федерацийын Кугыжаныш Тистыжын кечыже дене саламла. Ик эн кӱлешан пайрем дене саламлем. Лӱмлӧ триколор кужу истриян да мемнан элнан тӱҥ символжо улеш,  элым йӧратымым да патырлыкым ончыкта. Ончычсо тукымын сеҥымашыже дене кугешныше кажне россиянинлан тудо шерге. Ме элнан кугытшым да куатшым, калыкын эрыкан да икоян улмыжым шижына, - ойлалтеш марий Элым вуйлатышын пашажым шуктышын саламлымашыштыже.
           Йошкар-Олаште тиде пайрем кечым Российын республикысе эн кугу тистыжым кучен торжественно таҥошкылмаш дене палемдыме. Тудо олан рӱдыжӧ мучко эртен. Флагын кугытшо: кужытшо 20 метр, кумдыкшо 13 метр лийын. Таҥошкылмашке оласе калык да уна- влак, волонтёр да юнармеец- влак ушненыт.
             Фото: Марий Элым вуйлатышын организаций да аналитик виктемже.

Прошлые выпуски