Теҥгече 67 ял электротул деч посна кодын
Теҥгече республикыштына таул мардеж осалланен. Тудо пушеҥге, рекламе конструкций, эсогыл корно пале- влакымат сӱмыркален. Республикысе 67 илемыште электричестве дене проблеме лектын. «Россети Центр и Приволжье Мариэнергон» филиалже пашам ыштыме посна режимым увертарен. Молан манаш гын, секундышто 24 метр марте талышныше мардеж шуко еҥым электротул деч посна коден. Энергетик- влак Волжск, Звенигово, Куженер, Марий турек, Морко, У Торъял, Оршанке, Параньга, Медведево, Шернур да Советский районласе 67 ялыште энергоснабженийым пӧртылтеныт. Аварийно-тӧрлымӧ пашашке 84 еҥан 24 бригадым да 32 спецтехникым ушымо лийын. Электротулым жаплан пуаш 16 резерв источникым кучылтмо. Теҥгече 9 шагат каслан электросеть объектлаште пашам пытарыме да пашам ыштыме посна режимым кораҥдыме. Пелйӱдлан Мариэнергон специалистше- влак олмыктымо пашам тичмаш мучашленыт.
