2017-ше ий икымше январь марте аварийныйлан шотлымо пӧртла гыч калыкым кум ийыште кусарен пытарат
2017-ше ий икымше январь марте аварийныйлан шотлымо пӧртла гыч калыкым кум ийыште кусарен пытарат. Тидын шотышто ойпидыш деке ешартыш соглашенийым республикысе антикризис рӱдерыште пеҥгыдемдыме. Документеш шке кидпалыштым Марий Элым вуйлатыше Александр Евстифеев ден илыме вер да коммунал озанлыкым пужен ышташ полшышо фондын генеральный директоржо Константин Цицин пыштеныт. Тыгак республикысе адресный программым илышыш шыҥдарыме жапым кӱчыкемдыме дене пырля Марий Эллан оксам ойырымо лимитшат кугемеш. Ондак жапшым 2023-шо ийлан палемдыме ыле, ынде 2022 ийыш кусарыме. Республикым вуйлатыше палемден: тошто пӧртлам пытарыме да калыкым кусарыме пашам Президент поддерживатла, Фондат тидын шотышто кугу полышым пуа. Фондын директоржат республикыште тиде пашам сайын виктарен колтымо нерген ойлен. Лу ийыште лу тӱжем наре еҥым тошто пӧртла гыч кусарыме. Ешартыш оксан ужашыже республикыш уже толын. Генеральный директор тыгак чоҥымо у пӧрт- влакын сай качествыштым палемден.
