70 процент кумдык гыч шурным поген налме

                 Республикысе аграрий- влак шурным погымаште 300 тӱжемше рубежым эртеныт. Кызыт республикысе озанлыклаште уржа-сорла тургым умбакыже кая. Лектыш кодшо ийысе деч шукырак да 2020-шо ий дене келшен толеш. Тымарте 70 процент кумдык гыч поген налме, 300 тӱжем тонн пырчым погымо. Кажне гектарже кокла шот дене 28 центнерым пуа. Эн кугу лектышым  Марий Турек районысо озанлыклаште шийын налме- 49 тӱжем тонным, Медведевыште 46 тӱжем тонн, Оршанкыште 38 тӱжем тонным. Кокла лектыш дене ончалаш гын, Медведево районышто гектар гыч 42 центнерым, Оршанкыште 33-ым, Советскийыште 32 центнерым налыт. А теве «Семёновский» племзавод 53 центнерым пога, Курык марий «Деметра», Шернур «Лукоз» 35-ым, Волжский кундемысе «Москва» озанлык, Медведево «Пригородный», Советскийысе Ленин ден «У илыш» 30 центнер гыч, Марий Турек «Акпарс» ден «Куженерский» озанлык- влак гектар гыч 29 центнер дене налыт. Поснак палемдыме шуэш «Шойбулак» племзаводын кокияш шыдаҥ ден шожшым. Тушто мемнан республикылан рекордым ончыктымо. Ик гектар гыч 62 да 58 центнерым шийме, - увертара ял озанлык министерстве.
            Фото: Ял озанлык министерстве.

Прошлые выпуски