Таче Юрино районышто тулым йӧртымӧ
Пӱртӱс поянлык министерствын ончыктымыжо почеш, Юрино районысо кугу пожарым таче йӧртымӧ. Угарман область дене чекыште йулышӧ чодырам таче лу шагата пеле жаплан чарыме. Но тул лӱдыкшӧ тургым умбакыже шуйна. Йӱр йӱрмым шотыш налде чодыраште тул ылыж кертме лӱдыкшӧ тыгак кодеш. Тений туллан пижаш амалым айдемын титакше деч посна ятыр волгенче ыштен. Республикысе правительствын пунчалже дене тул ваштареш шогымо режимым 4-ше сентябрь марте шуйымо. Пӱртӱс поянлык министерстве чыла калыкым пеш тӱткӧ лияш да чодыраште, тудын воктене тулым ылыжташ огыл манын йодеш. Тул пижмым шекланенда гыч «Авиалесоохранын» диспетчер виктемышкыже 56-65-35 номеран телефон дене вигак йыҥгарташ йодеш.
