А.Евстифеев: Йоча сад ден школым монден коден, илыме верым чоҥаш ок лий
Республикым вуйлатыше Александр Евстифеев паша дене Йошкар-Ола мучко коштын савырнен. Тиде гана тудо кундемлам тичмаш вияҥдыме кышкарыште йоча сад- влакым чоҥымо йодышлан тӱткышым ойырен. Тиде амал дене вигак икмыняр мланде участкым ончен лектын. Икмыняр участке 320 верлан, иктыже 450 верлан чоҥаш йӧрышӧ. Нуным эше 10 ий ончычак чоҥаш келыштарышаш улыт ыле. Эн ончыч «Фестивальный» микрорайоныш миеныт. Тушто кок 180 веран садым чоҥаш палемдыме улмаш. Но чоҥышо- влак пайдам кондышо пачер- влакым чоҥен сдатленыт, а социал тӧнеж- влак мондалтыныт. А ынде ача-ава-влак йочаштым ола мучко коштыктат. Республикым вуйлатыше эше ик участкыш миен. Тудо Западный, Йыван Кырла, Черняков уремла да Мышино коклаште верланен. Тушто 450 верлан садикым чоҥаш палемдыме, но чоҥымо паша ок кае. Сандене Александр Евстифеев мэрийлан заказчик ден застройщик кокласе кылым закон кӱкшытыш кусараш кӱштен. Вес семын ок лий. Йоча сад ден школым монден коден, илыме верым чоҥаш ок лий,- каласен тудо. Правительстве председательын икымше алмаштышыже Александр Сальников кундемым вияҥдыме годым эн ончыч социал объект- влакым чоҥаш, а вара пӧртым нӧлташ темлен. Республикым вуйлатыше тыгай ой дене келшен да чоҥышо-влакын ойпидыш дене налме обязанностьыштым шуктымым пеҥгыдын терген шогаш кӱлеш манын. Олан тиде кундемыштыжак Козьмодемьянск тракт ден Черняков урем коклаште 320 верлан садикым да 1300 верлан школым чоҥаш палемдыме улмаш, но жапым шуйкалыме, объект- влак кызыт огыт чоҥалт. Тыгак 9-ше Б микрорайонышто 320 верлан садым чоҥышаш участкым ончен лекме. Туштат садикым чоҥаш тӱҥалме огыл. Чыла объект шотышто Александр Евстифеев олан мэржылан застройщик- влакын обязательствыштым закон почеш шуктыкташ кӱштен.
