Александр Евстифеев калыклан приёмым эртарен

Александр Евстифеев калыклан приёмым эртарен
Александр Евстифеев калыклан приёмым эртарен. Толшо еҥ- влакын тӱҥ йодышышт корным, тротуарым олмыктымо, тунемше- влакым автобус дене шупшыктымо, илаш йӧрыдымӧ пӧртла гыч калыкым кусарыме паша дене кылдалтыныт. Эн ончыч вашлиймашке Йошкар-Ола гыч кок йочан ава Любовь Катякина миен. Тудо 7-ше номеран школ кундемыште тротуарым олмыктымо йодышым тарватен. Шушаш тунемме ий тӱҥалмешке тушто чыла олмыктымо пашам ыштен шукташ сӧрымӧ. Ола гычак Анна Соколова Пролетарский уремысе корно нерген тургыжланен ойлен. Тушто социал аралтыш да тазалык аралтыш тӧнеж- влак верланеныт. Олан мэрже Евгений Масловын мутшо почеш, туштат корным шушаш ийын олмыкташ палемдыме. Медведево район Томшар ял гыч Диана Малинина Ежово школыш йоча- влакым шупшыктымо йодышым нӧлталын. Александр Евстифеевын мутшо почеш, тений 40 школ автобусым налме. Декабрьыште нуным районлашке колташ документ ямде лиеш. Теле каникул деч вара автобус кошташ тӱҥалеш, - каласен туныктыш министрын алмаштышыже. Советский районысо Луговой посёлко гыч Людмила Домрачева тошто пӧртла гыч калыкым кусарыме йодышым нӧлталын. Тусо аварийный пӧрт гыч 2020-шо ийыште калыкым кусараш палемдыме, манын вашмутым пуымо. Александр Евстифеев вуйын шогышо- влаклан йодыш- влакым контрольышто кучаш да калыкым палдарен шогаш кӱштен. Южо йодыш дене решений ончычак пале, а калык тидым ок шинче да приёмыш возалтеш. Сандене калыкым палдарыме пашам виктарен колтыман.

Прошлые выпуски