Ардысе врач амбулаторийлан у вашке полыш машина кӱлеш
Республикысе ОНФ Ардысе врач амбулаторийлан у вашке полыш машина кӱлеш нерген шижтара. Калык фронтын чолга еҥже- влак республикысе тазалыкаралтыш министерствыш Килемар районысо Арде амбулаторийлан у вашкеполыш машина кӱлеш манын йодмаш дене лектыныт. Улыжат ик вашкеполыш машинан гарантий жапше 2017-ше ийыштак лектын. Верысе калык полыш деч посна кодына манын тургыжлана. Арде илем районышто эн кугулан шотлалтеш. Райрӱдӧ деч 20-30 меҥге тораште чодыра лоҥгаште верланыше 20 ялыште кок тӱжем утла еҥ ила. 2009-ше ийыште у врач амбулаторийым почмо. Тушто аптеке, стоматологий, процедура, привике да вашкеполыш кабинет- влак улыт. Район администраций тиде кечылаште кӱрылтде пашам ышташ санитар автомобильым пуаш сӧрен. Тазалыкаралтыш министерствын увертарымыж почеш шушаш ийын федерал оксам ойырымо годым, у транспортым эн ончычак тушко колтымо лиеш.
