Черле- влакым эмлаш эше 30 койкым ешарыме
Марий Элыште коронавирус дене черланыше- влакым эмлаш эше 30 койкым шындыме. Кызыт республикыштына 8 медицина организацйыште 750 койкым кучылтыт. Тидыже Россий тазалыкаралтыш министерствын пеҥгыдемдыме норматив деч шукырак. Туге гынат, Оперативный штабын черетан заседанийыштыже Республикым вуйлатыше Александр Евстифеев лийын кертшаш лӱдыкшым ончылгоч шижын шогаш темлен. Республикын тазалыкаралтыш министрже Марина Панькова Марий Турек рӱдӧ эмлыме верыште ешартыш койкым шындаш лийме нерген ойлен. Тиддеч посна эмлалт лекше- влакым реабилитироватлаш Кичиер санаторийыште койко- влакым вераҥдаш палемдыме. Инфекций стационарлаште яра шогышо койко уке манаш лиеш. ИВЛ аппарат деке 16 еҥым ушымо. 40 процент черланыше кислород полышым налеш, 28 процентын черже нелын эрта, 72 процент кокла нелытанлан шотлалтеш. Тидын годымак черым сеҥен лекше- влакын чотышт тӱжемат 547 еҥыш шуын. Министр тыгак черым эртыше- влакын осложнений лийме нерген ойлен. Черланыше мӱшкыран ӱдырамаш- влак дене кылдалтше йодышымат тарватен. Черланыше кум ӱдырамаш азам ыштен. Кум ӱдырыштат таза улыт, но медик- влак нуным терген шогат. Хронический черан, 60 ий деч кугурак ийготан- влакым мӧҥгыштӧ эскерат. Самоизоляций жапыште тыгай пациентын чотшо 13 тӱжемат 418 еҥыш шуын. Медицина пашаеҥ- влаклан ешартыш оксам умбакыже тӱлат. Тиде жап марте 139 миллион теҥгем тӱлымӧ.
