Йошкар-Оласе уремлаште волгыдырак лиеш
Йошкар-Оласе уремлаште вич тӱжем утла ртутьан лампым светодиодан дене вашталтеныт. Тидын шотышто муниципал контарктым шуктымаш мучашыш лишемеш. Ола администрацийыште умылтарыме почеш, лампым оласе кудывечылаште вашталтыме. Лишыл жапыште подрядчик светодиодан лампым урем корнылаштат вераҥден пытара. Корныла воктене пычкемыш жапыште чылаже кок тӱжем утла у лампе волгалтараш тӱналеш. Тыге урем ден корнылаште волгыдырак лиеш, а электроэнергий шагалрак кучылталташ тӱҥалеш.
