Марий Элыште ача-влакым чапландарат
Марий Элыште ача-влаклан пӧлеклалтше икымше фотоконкурс лиеш. Тудо ончыкыжым кажне ийын эртаралтшаш да Ачан Тӱнямбал кечыжлан да Еш, йӧратымаш да ӱшанле улмо кечылан пӧлеклалтеш. Конкурс кызытсе ача- влакым ончыкташ гына огыл, а еш йӱлам уэш пӧртылтымӧ да пеҥгыдемдыме, шӱм-чон поянлыкым ешарыме, ешыште ачан рольжо деке тӱткышым кугемдымашке виктаралтын. Конкурсым Российысе ӱдырамаш- влак ушемын Марий Элысе пӧлкаже, Социал вияҥмаш министерстве да партийын пӧлкаже эртарат. Тушто вич номинаций лиеш: «Ача дене пырля», «Еш», «Кидше чылалан толеш», «Ача воктене гын, пиал» да «Самырык ача». Конкурсыш кажне кумылан еҥ ушнен кертеш. Тидлан сай фотосӱретым ыштыман да хештег дене социал сетьыш вераҥдыман. Вара 8-ше июль марте конкурсыш ушнаш йодмаш-анкетым колтыман.
