Чавайнын тоштер-пӧртшӧ деке корным 30-шо июнь марте уэмдат

Чавайнын тоштер-пӧртшӧ деке корным 30-шо июнь марте уэмдат
           Морко районышто Чавайнын тоштер-пӧртшӧ деке корным 30-шо июнь марте уэмдат. Тений «Илашлан инфраструктура» калыкле проектлан кӧра Морко районышто 29 меҥгыш погынышо куд автомобиль корным олмыктат. Подрядчик- влакым рашемдыме. Келшыше игече толмеке тӱҥ объектлаште пашаш пижыт. Ик кӱлешан объектше кум меҥгат 900 метр кужытан Чавайнур- Нуръял Корамас корно. Тушто тошто шартышым кораҥден у асфальтым пыштат, вӱдым колтышо 8 пучым олмыктат да корно тӱрым пеҥгыдемдат. Пашам 30 июньлан мучашлаш палемдыме. Тиде маршрут Чавайнур ялыште Сергей Чавайнын мемориал пӧрт-тоштерже деке намия.
            Эше ик кӱлешан корно- шым меҥге утла шуйнышо Морко- Изи Кушна трассе. Тудо вигак лу ялым административный рӱдер дене ушен шога. Тыштат чыла кӱлешан пашам шуктыман. Тыгак Коркатово(Кокласола)- Кожлаер, Нуж-Ключ- Пӧртылга- Тошметсола,  Кӧкрем- Петровский корным норматив марте шуктат.
           Фото: Марийскавтодор.

Прошлые выпуски