Чодыраште тулым йӧрташ тений 13 техникым налыт
Марий Элым вуйлатыше Александр Евстифеев Россий правительство председательын алмаштышыже Виктория Абрамченкон эртарыме селектор совещанийыште лийын. Тушто регион- влакын тенийсе пожар тургымлан ямде улмыштым каҥашыме. Вице-премьер палемден: кызыт Россий мучко чодыра пожар 223 тӱжем гектарыште шарлен. 35 кундемыште тул ваштареш кучедалме режимым пуртымо. Сибирь да Тора Эрвелыште тӱжемат 514 вере тул осаллана. Абрамченкон мутшо почеш, «Экологий» калыкле проект тӱҥалме ийыште чодыра пожар дене кучедалаш техникым пуат. Лу ий наре у техникым радам дене пуэдыме огыл. Сандене икымше гана федерал кӱкшыт гыч кундем- влаклан техникым налаш окса ойыралтеш. Тений кум миллиард теҥгем пуаш пунчалме. Кодшо ийын тиде калыкле проект почеш Марий Эл техникым налаш 52 миллион утла теҥге оксам налын ыле. Тудын дене 24 техникылан да 11 оборудованийлан поянрак лийме. Кодшо ийын республикыштына 26 апрель гыч 12-шо октябрь марте чодыраште 42 гана тул пижын. Чылаже 59 гектар кожлалан эҥгекым конден. Тений тулым йӧрташ ныл тӱжем утла еҥым ушаш, 648 техникым, 6 тӱжем оборудованийым кучылташ палемдыме. Тидыже кодшо ийысе деч шукырак. Тений ешарен 27 миллион теҥгелан 13 техникым да оборудованийым налаш палемдыме.
