Кодшо ийын йот элла гыч республикыш тунемаш 500 еҥ толын
Республикысе ВУЗ-лашке кодшо ийын йотэллан 500 ӱдыр-рвезыже тунемаш пурен. Кажне ийын 12-шо августышто Самырык- влакын Тӱнямбал кечышт палемдалтеш. Маристат тиде кече вашеш икмыняр уверым ямдылен. 2020-шо ий тӱҥалтышлан Марий Элыште 30 ияш марте самырык еҥ-влак 107 утла тӱжем улыт але уло калыкын 15 утла процентше. Мутлан, Российысе вузлаште йотэл студент- влакын чотышт 2010-шо ий гыч 2019-ше ий марте 153 тӱжем гыч 298 тӱжем нарыш шуын. Тыге, вузлаште йотэл студент- влакын чотышт 7 процентым эрта. Вес элла гыч толшо- влак утларакше Рӱдӧ федерал округышто улыт. Кокымшо верыште- Юл кундем округ, кумшо- Сибирь. Марий Элысе вузлашке кодшо ийын 249 йотэл студентым бакалавриат программе дене налме. 195 еҥ специалитет программе дене пурен, 62 еҥ магистратурыш толын. Тидыже тӱшка чот деч 14, 43 да 7 утла процент лиеш. Йотэл студент- влак мемнан республикыш тӱнян тӱрлӧ луклаже гыч толыт: Алжир, Ангола, Шри-Ланка, Конго, Индонезий, Египет, Индий, Ирак гыч. Ончычсо совет ушемын еҥже- влакат улыт: Азербайджан, Киргизий, Таджикистан гыч. Вузла пелен аспирантурышто 12 иностранец тунемеш, ординатурышто- 4. Нуно СНГ элла да тора йот элла гыч улыт.
