Кугу нелытым шупшыктышо имне- влакым Якутийыш урлыклан наҥгаят
Марий Эл гыч Якутийыш тяжеловоз-имне- влак каят. Руш тяжеловоз манме кум имне корныш лектеш. Тений Саха республикын ял озанлык министерствыже Марий Эл гыч кум имньым налын. Марий имне- влак мегежекский урлык имньым куштышо организацийлашке колталтыт. Июль мучашыште «Сахагроплем» тӧнежын селекций рӱдержым вуйлатыше Марий Элыш толын коштын да имне- влакым шке ойырен налын. Зоотехник служба имньын тукымвожшо да ару урлык улмыжо шотышто документым пуэн. Марий Элысе тяжеловоз- влакын кӱлешан чыла документышт уло. Нуно карантинный тергымашым, карантин жапым эртат да Якутийыш сентябрь кыдалне миен шуыт.
