Спорт-туризм министр Оршанкыш миен
Республикын спорт-туризм министрже Лидия Батюкова паша визит дене Оршанке районыш миен. Муниципал образованийым вуйлатыше Александр Плотников да тӱвыра, спорт пӧлкан специалистше Виталий Плотников дене вашлиймаште посёлкысо спорт инфраструктурым шымлыме, «Спорт илышын нормыжо» федерал проектым шыҥдарыме йодышым каҥашыме. Тыгак шушаш ийын ГТО-н изи спорт площадкыжым чоҥышаш верым онченыт. 21-ше ийыште калыклан ГТО нормативым шукташ шке семын ямдылалташ Оршанке ден Волжский районлаште оборудованийым вераҥдышаш улыт. Тушто гимнастикылан теҥгыл, брус, уремысе тренажёр, тӱрлӧ турник, кужытыш тӧрштылмӧ сектор лийшаш улыт.
