Кугече службым мӧҥгыштӧ ончыман
Республикыштына коронавирус инфекций ынже шарле манын, еҥ- влаклан юмын йӱла организаций ден шӱгарлашке кошташ чарыме. Тыгай вашталтышым теҥгече Республикым вуйлатышын Указышкыже пуртымо. Документ дене келшышын, 30-шо апрель марте, юмын службым онлайн трансляций дене эртарыше черке пашаеҥ- влак деч посна, юмылтымо верлашке да, тояш мийыме деч посна, шӱгарлашке кошташ ок лий. Юмылан ӱшаныше- влак 18 ше гыч 19-ше апрельыш йӱдым кугече службыш онлайн йӧн дене ушнен кертыт. Вияш теле да радио трансляцийым Шнуй Юмынаван кафедральный Благовещений соборжо гыч телеканал ончыкта. Тиддеч посна кугече службым Интернет сетьыште «Марий Эл» ГТРК ден «Марий Эл Телерадио» ончыктат. Изивий рушарня да Кугече вашеш Москон да Пӱтынь Русьын патриархше Кирилл храмыш коштмым жаплан чарнаш да мӧҥгыштӧ юмылташ ӱжын ойлен ыле. Марий Элым вуйлатыше Александр Евстифеев палемден: Кугече ик эн волгыдо да куанле, вучымо пайрем. Но кызытсе жаплан республикыште эпидемиологий ситуаций куандарыше огыл, кажне кечын черланыше- влак ешаралтыт. Сандене еҥ- влак шкеныштымат, лишыл еҥышымат вирус пижме деч аралышаш улыт. Поснак черкыш коштшо кугурак ийготан- влак нерген ойлем. Кугече юмылтымаш чер шарлымашке ынже кондо,- каласен республикым вуйлатыше.
