Екатеринбургышто эрла «Корно-2019» тӱнямбал специализированный выставке почылтеш

Екатеринбургышто эрла «Корно-2019» тӱнямбал специализированный выставке почылтеш
16-шо гыч 18-ше октябрь марте Марий Эл Екатеринбургышто «Корно-2019» тӱнямбал специализированный выставкыште участвоватла. Тушто корно да транспорт аланыште у технический разработко- влакым ончыктат. Мероприятийым Российын транспорт министерствыже Россий МВД-н Кугыжаныш автоинспекцийже, Росавтодор да «Автодор» кугыжаныш компаний дене пырля эртара. Тиддеч посна таче Екатеринбургышто Россий кӱкшытан семинар-совещаний кышкарыште «Корнышто коштмо лӱдыкшыдымылык» федерал проектым шыҥдарыме йодыш каҥашалтеш. Тидын вашеш теҥгече Правительстве пӧртыштӧ республикым вуйлатыше Александр Евстифеев совещанийым эртарен. Тушто республикым достойно ончыкташ да корно шотышто калыкле проектым шыҥдарыме сай опытым ончыкташ задачым шынден. «Марийскавтодорым» вуйлатыше Анатолий Аверинын мутшо почеш выставкыште  республикын 24 квадрат метр кумдыкан кок стендше лиеш. Тушто тений проектым шыҥдарыме показатель да шушаш ийлан ыштышаш паша ончыкталтеш. Пашам шуктымо нерген видеоролик каласкала. Правительстве вуйлатышын икымше алмаштышыже Александр Сальников ешарен: 
шушаш ийлан контрактым ыштыме денат республике сай лектышым ончыкта. Выставкыште тыгак «Ушан корно» системын элементше- влакым ончыкташ палемдыме. Республикым вуйлатыше тыгак качествым кузе тергымымат ончыкташ кӱлеш манын. Республикысе калыкын да вуйлатыше- влакын шуктымо пашалан тауштымашан обращенийыштат уло. Тудымат ӧрдыжеш кодыман огыл.  Александр Евстифеев иктешлен тыге каласен: Марий Эл умбакыжат «Лӱдыкшыдымӧ да сай качестван автомобиль корно- влак» проектым шыҥдараш ямде улеш.

Прошлые выпуски