Ял озанлык Марий Элысе экономикын ик эн кӱлешан ужашыже
Теҥгече ял озанлыкыште тыршыше- влак шке профессионал пайремыштым палемдышт. Республикысе валовый продуктышто ял озанлыкын ужашыже 19 процентым айла. Ял озанлык Марий Элысе экономикын ик эн кӱлешан ужашыжлан шотлалтеш. Тудо кочкыш сату, экономик, экологий да социал лӱдыкшыдымылыкым ышта, да калыкын илыш кӱкшытшым тӧр кучаш йӧным пуа. Кодшо ийын ял озанлык сатум ыштен лукмо индекс ончычсо ий дене таҥастарымаште 111 процентыш шуын, тенийсе икымше пелийыште 110 процент лийын. Ял озанлык сатум тӱҥ шотышто ял озанлык организаций- влак ыштен луктыныт. Нунын сатушт 68 процентым айлен. Кодшо ийын ял озанлыкыште 11 тӱжемат 500 еҥ тыршен. Тӱҥ отрасльлан кушкылым куштымаш да вольыкым ончымаш шотлалтеш. Пытартыш ийлаште импорт сатум вашталтыме программе дене келшышын, вольык озанлык ончыкырак лектеш. Вольыкым да сурт кайыкым шыллан ыштен налме дене кодшо ийын республикына Юл кундем округышто визымше верыш лектын, сурт кайык шылым ыштен налме дене- нылымше верыште. Республикын тӱҥ кочкыш сатум шкалан шке ситарыме дене кодшо ийын лектышыже почеш тыгайрак сӱрет: шылым 349 процентлан, пареҥгым 118 процентлан, саскам 116 процентлан ситара.
