Эн кӱлешан объект верч йӱклена
Марий Элыште илыше-влак «Достижения.РФ» порталыште кундемнан ик эн кӱлешан объектше ден мероприятийже-влак верч йӱклат. Республикына 11 проектым темлен. Сеҥышыш лекше-влак дене ноябрьыште Москваште «Россия» тӱнямбал ончер-форумышто палдарат. Тушко элнан чыла регионжо науко, технологий, тӱвыра дене кылдалтше эн сай проектше-влакым луктыт. Марий Элыште йӱклымашке 28 тӱжем наре еҥ ушнен. Эн шуко йӱкым кызытеш «Акашевский» чывефабрика ден «Шойбулакский» племзавод погеныт. Кумшо верыште Марий балет.
