Йошкар-Олаште Россий Армий тӱвыра пӧрт кумдыкым тӱзатымаш умбакыже шуйна
Йошкар-Олаште Россий Армий тӱвыра пӧрт кумдыкым тӱзатымаш пашам октябрь мучаште пытарышаш улыт. Тушто «Комфортан оласе средам формироватлымаш» калыкле проект почеш ракетчик-влаклан чапкӱмат шогалтат. «План почеш ты пашам кеҥежымак шуктышаш улыт ыле. Но тӱрлӧ амаллан кӧра тидым ыштыме огыл. Паша шукталтмым Йошкар-Оласе администраций ден оласе прокуратора тергат. Подрядчиклан ынде кугу штрафым тӱлыман да шке пашажым писынрак мучаш марте шуктыман». Тыге Йошкар-Оласе мэрын икымше алмаштышыже Лев Покровский каласен.
