Эн уста пожарныйым рашемденыт

Пембе посёлкысо тунемме да тренировкым эртарыме манежыште  пожар ваштареш кучедалше федерал службын пашаеҥже-влак коклаште таҥасымаш эртен. Мероприятий икмыняр йыргешке датылан пӧлеклалтын: Россий МЧС-лан 30 ий, Марий Эллан 100, Кугу Сеҥымашлан 75 ий теммылан. Таҥасыше- влак эн ончыч теорийым шинчымашым тергеныт. Эн онайже практикыште моштымашым ончыктымаш лийын. Тулым йӧртышӧ- влак сай тазалыкым да чолгалыкым ончыктеныт. «Пожар охранын эн сай пашаеҥже» да Эн сай пожарный» номинацийыште сеҥышыш Йошкар-Оласе 6-шо пожар да утарыше часть гыч Николай Новосёлов ден специализированный пожар да утарыше частьын мастер-пожарныйже Геннадий Волков лектыныт. Караулын эн сай начальникше лӱм верч кучедалмашат пӱсын эртен. Сеҥышыш Волжск оласе 12-шо пожар-утарыше частьын караулжым вуйлатыше Константин Ашкельдин лектын. Кокымшо верыште Йошкар-Оласе СПСЧ-н дежурный сменыжым вуйлатыше Александр Пехметов, кумшо верыш Йошкар-Оласе 2-шо часть караулжым вуйлатыше Евгений Погадаев лектыныт.

Прошлые выпуски