Кугыжаныш Советын пашаче группыжын заседанийыштыже илыме вер рынкым да оласе кумдыкым вияҥдыме йодыш- влакым ончымо
Кугыжаныш Советын пашаче группыжын заседанийыштыже илыме вер рынкым да оласе кумдыкым вияҥдыме йодыш- влакым ончымо. Россий Федерацийысе Кугыжаныш Советын пашаче группыжын «Чоҥымаш, илыме вер да коммунал озанлык, оласе кумдык» теме дене черетан заседанийжым пашаче группым вуйлатыше, Татарстанын Президентше Рустам Миннеханов эртарен. Тудын пашаштыже Россий Правительство председательын алмаштышыже Марат Хуснуллин, чоҥымаш, илыме вер да коммунал озанлык министр Владимир Якушев участвоватленын, Марий Элым вуйлатыше Александр Евстифееват лийын. Мероприятий видеоконференцкыл йӧн дене эртен. Погынымаште Российысе кундемлам вуйлатышыштын пашаштын эффективностьшым аклыме показатель- влакым рашемдаш темлымаш- влакым пуртымо да калыкле проект- влакын целевой показательыштым тӧрлымаш нерген мутланыме. Президент Владимир Путинын Указше дене аклыме 15 показательым палемдыме. Тушечын кумышто каҥашыме теме дене кылдалтын: илыме верым саемдыше ешын чотшо, илыме верым налын кертме кӱкшыт да чапле ола кумдыкан ола- влакын чотышт. Теҥгече 2030-шо ий марте Российым вияҥдыме калыкле цель- влак нерген Президентын Указше лектын. Тушто 30-шо октябрь марте правительствылан калыкле проект- влакым корректироватлаш кӱштымӧ. Показатель- влакым рашемдыме. Мутлан, илыме верым чоҥымаш талукышто 120 миллион квадрат метр деч шагал огыл лийшаш, оласе кумдыкын качествыжым иктат пелылан сайракым ыштыман. Марий Элыште кодшо ийын 397 тӱжем квадрат метр илыме верым чоҥымо. Тидыже 2018-ше ий дене таҥастарымашыте 118 процент лиеш. Шке оза- влакат кодшо ийын утларак пӧртым чоҥеныт. Республикысе чоҥымаш министерствын да ЖКХ-н ончыктымышт почеш кызыт илыме вер утыж дене темлалтеш. Окса ситыдымылан кӧра пачерым шагалрак налыт да чоҥымашат шагалемын. Тымарте кок тӱжемат пеле пачер ужалалтде шога.
