Гармоньчо да калык семӱзгар ансамбль- влакын регион кокласе кӱкшытан фестивальышт лийын

Гармоньчо да калык семӱзгар ансамбль- влакын регион кокласе кӱкшытан фестивальышт лийын
           Йошкар-Олаште гармоньчо да калык семӱзгар ансамбль- влакын регион кокласе кӱкшытан фестивальышт лийын. Марий Самырык театрыш Марий Эл да Башкортостан гыч гармоньчо, лудыш мурым мурышо, мурызо да калык семӱзгар ансамбль- влак погыненыт. Пайрем мероприятий театрын фойештыже марла куштымаш дене тӱҥалын. Самырык музыкант- влак дене пырля  ончаш толшо- влакат кушташ лекде чытен огытыл. Туштак Юл кундемысе калык- влакын гармоньыштым- мастар- влак Киров кундем гыч Василий Петуховын, Марий Эл гыч Александр Ивановын семӱзгарыштым ончыктымо выставке пашам ыштен. Фестиваль 4 гыч 18 ияш марте 14 самырык гармоньчым, республикысе куд район гыч 9 калык семӱзгар ансмабльым да Пошкырт вел гыч кок ансмабльым чумырен. Тушто шӱвыр, шиялтыш, кӱсле, тӱмыр, оҥгыр, шӱшпык, совла, тальянка, гармонь йӱкым колышташ лиеш ыле. Самырык талант- влакын кажне выступленийыштым ончаш толшо- влак совым рӱж кырен, уэш пачаш ончыкташ йодыныт, пеледышым, пӧлекым кучыктеныт. Чыла участниклан диплом ден призым пуымо.
          Фото: Тӱвыра министерстве.

Прошлые выпуски