«Гордей» футбол премий тений кӧлан логалын?

Йошкар-Олаште «Гордей» марий профессионал футбол премийым кучыктымаш эртен. «2019-ше ийын футболистше» лӱмым Нижнекамск ола гыч «Нефтехимик» футбол командын 27 ияш защитникше Лев Потаповлан пуымо. Тудо шке футбол карьерыштыже тиде статуэткым кумшо гана налын. Марий футболын воспитанникше 19-ше ийыште эртыше элын первенствыштыже чыла 35 матчыштыжат полеш лектын. Кокымшо верыште Йошкар-Оласе «Дружба» да Советскийысе «Звездаште» модшо Константин Бастраков, кумшо верыш Самара оласе «Крылья Советов» команде гыч Геннадий Киселёв лектын. «Легенда» номинацийыште 71 ияш Виктор Михайловым палемдыме. Тудо 1972-шо -1980-шо ийлаште Йошкар-Оласе «Спартак» ден «Дружба» командылаште модын. Самырык футболист- влаклан «Гордейчик» номинацийыште Йошкар-Олаште шочшо кызыт Озаҥысе «Рубин» клубын академийыштыже шуаралтше 18 ияш вратарь Данила Световым палемдыме. «Болельщик» специальный номинацийыште «Дружба» стадионын директоржо, журналист, футбол статистикым палыше 60 ияш Михаил Виндюшовын надыржым аклыме. Палашлан: футбол премийын «Гордей» лӱмжӧ 60-70-шо ийлаште Йошкар-Оласе футболым йӧратыше- влак коклаште чапланыше футболист Пётр Гордеев дене кыдалтын. Модмыж годым тудым тыгак лӱмденыт. Тудо марий футболын эн сай качествыже- влакым ушен шоген.

Прошлые выпуски