Пачер шотышто ондалалтше икмыняр еҥ у илемыш куснышаш

Пачер шотышто ондалалтше икмыняр еҥ у илемыш куснышаш
Шке оксам пыштен пачерым чоҥаш шонышо да ондалалтше- влаклан республике  У ий вашеш чапле пӧлекым ышта. Нунын кокла гыч икмынярыже лач пайремлан шукертсек вучымо у пачерыш илаш пура. Йӱла почеш идалык мучашыште Марий Элым вуйлатыше Александр Евстифеев тений мом ыштен шуктымо шотышто отчётым ыштен да эртыше идалыкым «сай» манын аклен. Илыме фондым уэмдыме паша тений умбакыже шуйнен. Шуко пачеран 100 илыме пӧртым капитально олмыктымо. Олтымо тургымлан ЖКХ системым тӱрыс олмыктымо. Сеть озанлыкын тоштеммыже прблемыш савырнен. Тиде йодыш гыч лекташ манын, тудым идалык еда уэмден толыт. Тений 12 меҥге наре кужыт тепломагистральым, 6 меҥге вӱд пучым, ныл меҥге канализаций сетьым вашталтыме, мланде шӱй дене пашам ыштыше икмыняр котельныйым газ дене пашам ыштышыш кусарыме. 67 миллион теҥгем вӱдым ситарыме объект- влакым чоҥаш да пужен ышташ ойырымо ыле. Тушечын 40 миллионжым Звенигово да Волжскышто канализаций коллекторым вигак олмыкташ колтымо. Федерал проект да кугыжаныш программе почеш 75 кудывечым да 46 тӱшка кумдыкым тӱзатыме. Тиде пашалан 220 миллион теҥге каен. Тиддеч посна «Эҥер сер- Звениговын чонжо» проект почеш Юл серым тӱзландараш 57 миллион теҥгем кучылтмо. Килемар посёлкышто вӱд пучым чоҥымо да пашаш колтымо. «Юл эҥерым тазаҥдымаш» проект почеш шуко  паша ышталтеш. Медведево районысо Шоядӱр ялыште у пӧрт- влак деке корным ыштыме. Ондалалтше дольщик- влакын йодышыштым виктарен колтымо шотыштат шуко ыштыме. 12 еҥ окса компенсацийым налын, кок объектыште чоҥымо пашам тӱналме да вашке мучашлалтшаш улыт. Таче- эрла вич еш у пачерым налшаш. Кокымшо пӧртшӧ 20-шо ий мучашлан ямде лийшаш. Тыге, пытартыш 95 ондалалтше еҥ у пачеран лиеш. Тидын дене кугу йодыш кораҥдалтшаш.

Прошлые выпуски