Идалык мучаш марте эше 157 тулык йоча у илыме верым налеш
Идалык мучаш марте эше 157 тулык йоча у илыме верым налеш. Тидын нерген Марий Элым вуйлатышын сомылжым шуктышо Юрий Зайцевлан оперативный совещанийыште чоҥымаш министр Михаил Степанов каласклаен. Доклад дене келшышын тений чылаже тулык йоча- влаклан пачерым налын пуаш 373 миллион наре теҥгем палемдыме. План почеш 297 пачерым пуыман. 140 тулык йоча тымарте у илеман лийын. Нунын кокла гыч 120 пачерым Семёновка селаште пуымо. Тушто тений декабрь марте эше ик пӧртым чоҥен шуктымо лиеш. Тиде пӧртыштӧ 49 тулык йоча пачерым налшаш. Июльышто Солнечный посёлкышто пӧрт шукталтеш. Тушто кок пачерым пуаш палемдыме. Эше ик пӧрт Волжск олаште чоҥалтеш. Тушто аварийный пӧртла гыч кусарыме 20 тулык йоча илемым налшаш. Декабрь марте Шойбулак селаште пӧртым чоҥен шуктат. Тушто 34 пачерым пуаш палемдыме. Эше кок пачер Юрино районышто пуалтшаш. Министр тидымат палемден: лу пачерым «Земский доктор» да «Земский учитель» программе почеш налаш палемдыме.
Фото: Марий Элым вуйлатышын организаций да аналитик виктемже.
Фото: Марий Элым вуйлатышын организаций да аналитик виктемже.
