Ынде Йошкар-Олаште шоколадынат тоштерже уло

Республикыште шоколадын тоштерже почылтын. Марий Элын ял озанлык министрже Александр Гречихо Йошкар-Олаште «Шоколадын тоштержым» торжественно почмаште лийын. Тиде ойыртемалтше проектым шукерте огыл почылтшо «Крафт» компанийын амалкалчыже- влак шонен луктыныт да илышыш шыҥдареныт. Ассортиментышке Эквадор гыч вигак кондымо шоколад гыч ыштыме 7 сату пура. Производствын куатше- тылзыште кум тонн наре шоколадым лукташ йӧным пуа. Тоштерыш толшо- влак шоколадын историйже, тудым ыштыме технологий нерген пален налыт, мастер классыш ушнен кертыт да шке кид дене ыштыме шоколад сувенирым пеленышт наҥгаят. Министрын мутшо почеш, тоштер сатум ямдылымаш дене палыме лияш моткоч келшыше вер. Шоколадым ыштыме годым чыла натуральный продуктым кучылтмым шке шинча денак ужаш лиеш. Тидыже налше еҥлан пеш кӱлешан. Кызыт тиде компаний брендшым республикыштат, ӧрдыж кундемлаштат шарен колташ тырша. Мутлан, «Шӧртньӧ шыже-2019» Российысе выставкыште той медальым сеҥен налын ыле.

Прошлые выпуски