«Кӱан эҥер» санаторий негызеш «Авангард» тунемме- методик рӱдер лиеш
Самырык тукымым военно-патриот шӱлышеш шуарыме «Авангард» тунемме- методик рӱдерым «Кӱан эҥер» санаторий негызеш ыштыме лиеш. Тыгай пунчалым теҥгече Правительстве пӧртыштӧ лукмо. Республикым вуйлатыше Александр Евстифеев «Авангард» рӱдерым ыштыме йодыш дене совещанийым эртарен. Тудо палемден: патриотизм шӱлышеш шуарыме йодыш пеш кӱлешан да пӱсын шогышо. Тудо федерал повесткыш пура, Росий Президентын, оборона министрын, полпредын контрольыштышт улеш. Правительстве председательын икымше алмаштышыже Михаил Васютинын мутшо почеш, «Авангард» рӱдерлан шуко верым, йоча лагерьым ончымо. Но йодмашлан лач «Кӱан эҥер» санаторий гына келшен толын. Тушто шуко еҥым вераҥдаш, пукшаш, занятийым эртараш, спорт дене кылым кучаш йӧн келшен толшо. Тиде армий илышым ушештарыше тунемме сбор-влакым эртарыме комплекс лийшаш. Лач тудын статусшым гына вашталташ кӱлеш. Тудо олан погыжлан шотлалтеш, а кусараш кӱлеш республике ӱмбаке. Оксамат республике тӱлаш тӱналеш. Варарак Йошкар-Оласе Сеҥымаш паркыште «Патриот» военно- патриот паркын выставке секторжо ышталтшаш. Тушто Воин чап аллей да вооруженийым ончыктышо площадке лийшаш улыт.
