Индешымше микрорайонысо пӱян пӱрымашыжым каҥашаш тӱҥалыт
Йошкар-Ола ден Медведево коклаште 9-ше Б микрорайонышто верланыше пӱян пӱрымашыжым тӱшка каҥашымашке лукташ темлат. «Йошкар-Ола калык контроль» группышто увертарыме: тиде кундемыште илыше- влак пӱям арален кодаш да тӱзландарышаш верч 100 утла подписьым погеныт. Чолга еҥ- влак тиде пӱям «Оласе йӧнан илыме кумдык» программыш пурташ шонат. Йыван Кырла, Строитель, Васильев, Черняков уремла коклаште верланыше пӱя олмышто чоҥышо организаций илыме верым чоҥаш документацийым ямдылен. Тиде пӱям шке жапыштыже шошо вӱдым чумыраш манын кӱнчымӧ. Йошкар-Ола администрацийын пунчалже почеш, ямдылыме документацийым пеҥгыдемдыме деч ончыч, тудым тӱшка калык каҥашышаш. Каҥашыме нерген увер Йошкар-Ола администрацийын сайтыштыже вераҥдыме лиеш.
