Йоча фольклорын «Кугезе вож» фестивальже Оршанке посёлкышто лиеш
Йоча да самырык- влак фольклорын республике кӱкшытан «Кугезе вож» фестивальышт Оршанке посёлкышто 19-ше февральыште эрта. Тушко 11 районысо школла гыч тунемше, театр студий, йоча фольклор коллектив- влак ушнат. Нуно йӱлам, калык пайремым. Фольклор миниатюрым, калык муро ден куштымашым, семӱзгар семым да шымлыме пашам ончыктышо усталык программыштым кондат. Паша- влакым эн сай сценарий, возымо паша, сценыште шындыме программе, фольклор произведенийым эн сайын ончыктымаш номинацийлаште аклаш тӱҥалыт. Йоча фольклор фестивальым тӱвыра министерстве, калык усталык рӱдер да Оршанке район администраций ямдылат.
