Россий президентын кӱштымыж почеш регионласе вузлаште бюджет верым ешарыме лиеш

Россий президентын кӱштымыж почеш регионласе вузлаште бюджет верым ешарыме лиеш. Марий Элым вуйлатыше Александр Евстифеев теҥгече Госсовет Президиумын да Президент пеленысе шанче да туныктыш шотышто Советын кумдаҥдыме заседанийыштыже участвоватлен. Тудым Кремльыште элым вуйлатыше Владимир Путин эртарен. Тӱҥ теме, калыкле проект- влакым шотыш налын, экономике да социал сферылан кадрым ямдылымаште регион- влакын рольышт кугемме гыч лектын шога. Посна тӱткышым экономикын йодмыж дене кыдалаш да кӱшыл шинчымашым пуымашын келшен толмышт, интеллектуал поянлыкым арален кодымаште да вияҥдымаште туныктыш да шанче организацций- влакын, кучем орган ден пашам пуышо- влакын у вашкылыштым ыштымыштлан ойырымо. Президент 2021-ше ий гыч идалык еда самырык пашаеҥ- влакын ситыдыме регионысо вузлаште бюджет верым ешарен толаш кӱштен. Ныл ийыште тиде пашалан 70 миллиард наре теҥге ешартыш оксам колташ палемдыме. Тиддеч посна Владимир Путин лицензий деч посна пашам ыштыше частный институт ден вуз- влакым пытараш кӱлеш манын каласен. Марий Элыште 24 профессионал организаций да кум кӱшыл школ квалификациян кадрым ямдылат. Профессионал шинчымашым 16 тӱжем утла тунемше, вузлаште 20 тӱжем утла студент налеш. Тушечын кок тӱжем утла студентше йот элла гыч толшо улыт. Республикыште могай пашаеҥын кӱлешлыкшым шотыш налын, ТОП-РЕГИОН профессий преченьым ыштыме. Тушко 50 профессий пура. У направлений дене кум тӱжемат пеле студент тунемеш.

Прошлые выпуски