Ийготыш шудымо- влак водитель удостоверений деч посна руль воктеке чӱчкыдынрак шинчаш тӱҥалыныт
Ийготыш шудымо- влак водитель удостоверений деч посна руль воктеке чӱчкыдынрак шинчаш тӱҥалыныт. Тыгай правонарушений нерген увер ийготыш шудымо- влакын пашашт шотышто оласе комиссийыш пуалтеш. Тений январь гыч ноябрь марте Йошкар-Олаште ийготыш шудымо- влакын 41 тыгай правонарушенийыштым регистрироватлыме. Тиддеч посна кок слуйыштыже ийготыш шудымо- влак траснпортым йӱшӧ вуя виктареныт. Права деч посна машинам виктарыше подросткылан 5 гыч 15 тӱжем теҥге марте штрафым тӱлыктат. Тудын шке ыштен налме пашадарже уке гын, оксам ача-аваже деч кӱрын луктыт. Наказаний йӱшӧ вуя улмылан эше пеҥгыдырак лиеш. Шарнен шогыман: подросткын ача-аважат йочам кӱлеш семын воспитатлыдымылан административно мутым кучаш шогалталтыт.
Фото: Йошкар-Ола администраций.
