Класс вуйлатыше-влаклан ешарен тӱлат
Марий Элым вуйлатыше Александр Евстифеев Россий просвещений министр Сергей Кравцовын эртарыме онлайн погынымашкыже ушнен. Тушто тӱҥалтыш класслаште тунемше-влакым шокшо кочкышым пукшымо да классым вуйлатымылан ешарен тӱлымӧ нерген каҥашеныт.
Тиде тунемме ийыште Марий Элысе школлаште 36 тӱжем 500 йоча тӱҥалтыш класслаште тунемеш. Нунын чылаштым яра пукшат. Республикысе чыла 248 школышто пищеблок-влакым кӱлеш оборудований дене йӧнештарыме. А классым вуйлатыме нерген ойлаш гын, 1-ше сентябрьлан Марий Элысе школлаште тиде пашам 4 тӱжем 61 туныктышо шукта. Нунылан пашадарышт деке 5 тӱжем теҥге дене ешарен тӱлаш тӱҥалыт.
