Кок еҥлан 8 Март Юл эҥерыште изиш гына пытартыш лийын огыл
8-ше март пайрем кече Юл эҥерыште экшык деч посна эртен огыл. Курык марий районысо Коротньо ял кундемыште шым шагат кас гутлаште Юл гоч вончышыла, кок самырык еҥ вӱдыш пурен каен. Козьмодемьянскысе аварий да утарыше группа нуным вӱд гыч луктын кертын. Тиддеч кок кече ончыч Утарыше- влак Коротньо гыч эш ик еҥлан полшеныт. Тудат Юл гоч Козьмодемьянскыш туралан лекташ шонен да иян вӱдыш волен. Мондыман огыл: тений эр толшо шошо, ий пеҥгыде огыл.
