Уфа олаште пожар да утарыме спорт дене Россий кӱкшытан таҥасымаш- влак эртеныт
Уфа олаште март тӱҥалтышыште пожар да утарыме спорт дене Россий МЧС-ын Пӱтынь Россий кӱкшытан кугу таҥасымашыже- влак эртеныт- «Россий МЧС-ын Кубокшо да «Добровольный пожар охрана Рӱдӧ советын Кубокшо». Уло эл гыч 12 эн виян команде радамыште 350 утла еҥ погынен. Эн изи участникше 13 ияш лийын гын, эн кугужо – 45 ияш. Марий Эл гыч 17-18 ияш ӱдыр- влак тӱшкаште Волжск оласе 5-ше школын 11-ше классыштыже тунемше, спорт мастерыш кандидат Дарья Попова миен. Куанен палемдыман, тудо чарак полосам эртымаште кокымшо верым сеҥен налын. Тыгак тунемме башньын кокымшо пачашысе окнашкыже штурмоватлыме тошкалтыш ден кӱзымаште кокымшо лийын да Российын спорт мастер нормативше деч кӱкшырак лектышым ончыктен. Россий чемпионатыште кок ший медальым сеҥен налмаш Дарья Поповалан пожар да утарыме спорт дене Российын сборный командышкыже кандидатлан пураш йӧным ыштен.
