Кугыжаныш Погынын депутатше- влак Российын Конституцийышкыже тӧрлымашым пуртымым сайлан шотленыт
Марий Эл Кугыжаныш Погынын депутатше- влак Россий Федерацийын Конституцийышкыже тӧрлымашым пуртымо шотышто пакетым поддержатленыт. Кок кече ончыч Кугыжаныш Дума Россий Констутцийын тӧрлымаш нерген законым сайлан шотлен ыле. Теҥгече Кугыжаныш Погынын 8-ше сессийыштыже марий парламентарий- влак шке шонымашытым каласеныт. Сессийыште Марий Элым вуйлатыше Александр Евстифеев участвоватлен. Депутат- влак Россий Конституцийын «Публичный кучемын пашам ыштымыже шотышто южо йодыш- влакым виктарымашым саемден колтымо нерген» законыш вашталтышым пуртымо шотышто йодышым онченыт. Йӱклымаш деч ончыч депутат- влак ончылно Федераций Советын еҥже, Марий Эл деч сенатор Константин Косачёв ойлен. Тудо Конституцийыш тӧрлымашым пуртымо шотышто Президент плен ыштыме пашаче группыш пура. Сенатор палемден: тӱҥ законыш тӧрлымашым пуртымаш кызытсе илышын йодмыж почеш ышталтеш. Ме Конституцийым огына вашталте. Конституций стройын негызшым ыштыше, калыкын праваже, эрыкше, Конституцийым вашталтыме радамым палемдыше икымше, кокымшо, индешымше глава- влак тыгаяк кодыт. Тӱҥ законыш тӧрлымаш пурталтеш. 26 ий жапыште илыш ятырлан вашталтын. Сандене тӧрлымаш лийшаш, манын тудо. Эн кӱлешан тӧрлымашлан Кугыжанышын калык ончылно социал обязательствыжым шотла. Сессийыште Россий Конституцийын «Публичный кучемын пашам ыштымыже шотышто южо йодыш- влакым виктарымашым саемден колтымо нерген» законыш тӧрлымашым пуртымашым ончымо шотышто Кугыжаныш Погынын пунчалжым теҥгечак Федераций Советыш колтымо.
