Кугу пайрем- влакын паша радамыштым савыктыме

           Марий Элыште Калыкын икоян улмо да Марий Элым ыштымые кечылан пӧлеклалтше пайрем мероприячтий- влак ныл кече шуйнат. Нылымше ноябрьын Республикылан калыкын икоян улмо кечыже гына огыл, тыгак Марий автоном областьым, кызыт Марий Эл Республикым ыштыме кече. Тений республикылан 102 ий темеш. Нине пайремлан кугу мероприятий- влак эртат, тушко чыла муниципал район ден ола- влакат ушнат. Чылаже 100 утла мероприятий ден акций лиеш. Мутлан, таче татар тӱвыра рӱдерыште «Келшымаш шонапыл» этнокультурный касым, Ленин лӱмеш тӱвыра полат «Самырык- влакын тӱняшт» тӱрлӧ калыкын костюмыштым ончыктымо шоу-программым ончыктеныт. Таче да эрла Россий Армийын тӱвыра полатше оласе кид-паша мастарлык конкурсым эртара.
          3-шо ноябрьыште Чавайн лӱмеш книгагудышто 11 шагатлан Кугу этнографий диктант тӱҥалеш. Ленин лӱмеш тӱвыра полатыште 15 шагатлан «Пырляште мемнан вийна» калыкле тӱвыра пайрем лиеш. Эрик Сапаев лӱмеш театрыште 18 шагатлан Пӱтынь марий йоча хорын да Пӱтынь марий йоча симфонический оркестрын концертыштым ончаш лиеш. Йошкар-Олан историй тоштерыштыже 17 гыч 21 шагат марте «Сымыктыш йӱд» Россий кӱкшытан акций лиеш.
          Нылымше ноябрьлан эшеат шукырак мероприятийым ямдылыме. Сеҥымаш паркыште пайрем куржталмаш 10 шагатлан тӱҥалеш, 13 шагталан концертым ончыктат. Сеҥымашын 30-шо идалыкше лӱмеш тӱвыра полатыште 14 шагатлан «Гармонь пайрем» марий гармоньын фестивальже почылтеш. Яков Эшпай лӱмеш Марий кугыжаныш филармонийыште 18 шагатлан Владимир ола гыч «Русь» Кугыжаныш мурышо да куштышо ансамбль ден «Марий Эл» Кугыжаныш куштышо ансамбль пырля концертым эртарат. Сӱрет галерейыште 17 шагатлан «Йошкин пырыс» сай сем фестиваль тӱналеш.
          Пайрем 5-ше ноябрьыштат шуйна. Россий Армийын тӱвыра полатыштыже 9 гыч 21 шагат марте Россий кӱкшытан «Россиын шӱдыржӧ» патриот муро фестиваль-конкурс эрта.

Прошлые выпуски