Кугу скоростян «Москва-Озаҥ» магистраль Марий Эл гочат кая

Кугу скоростян «Москва-Озаҥ» магистраль Марий Эл гочат кая
           Кугу скоростян «Москва-Озаҥ» магистраль Марий Элысе Волжский округ ден Звенигово район гоч эрта. Россий правительстве председатель Михаил Мишустин вийжым йомдарыше документ олмеш федерал кӱкшытан автомобиль корно да федерал транспорт аланыште Российысе территориальный планированийын схемыжым пеҥгыдемдыме нерген распоряжениеш кидпалыжым пыштен. Схемыш 158 корно объект да 167 кӱртнӧ корно, юж, теҥыз да кӧргӧ вӱд транспорт объект пурен. Нуным пужен ышташ але тӱрлӧ регионышто чоҥаш палемдалтеш. Нунын коклаште «Моско- Озаҥ» кугу скоростян магистраль уло. Документ почеш тудо Марий Эл гочат эртышаш.               
            Моско гыч Озаҥ олаш кугу скоростян кӱртньӧ корно нерген мутланымаш шукертсек кая. Мутлан, 2018-ше ийыште Россий кӱртньыгорнын, регионлам вуйлатыше да эксперт- влак дене каҥашыме. Тунам проект почеш «Памар» у станцийым да транспортно-пересадочный узелым чоҥаш да Йошкар-Ола марте кӱртньӧ корно ден магистральым ушаш лийме технический решений- влакым ышташ палемдыме ыле. 2025-ше ийыште вияш линий годым Президент Владимир Путин тиде проект илышыш шыҥдаралтшаш манын каласен.
             Тунамсе проект почеш магистральын кужытшо 790 меҥге шотлалтын. Поезд- влак шагатыште 360 километр писылык дене коштшаш улыт, Моско гыч Озаҥ марте поезд 14 шагат олмеш кум шагат пелыште толын шушаш. Михаил Мишустинын пеҥгыдемдыме документым Российын транспорт стратегийжым да 2036-шо ий марте стратегийым шотыш налын ямдылыме.
          Фото: ru.freepik.com сайт гыч.

Прошлые выпуски