Марий Эл ВДВ-н кечыжым «Десантник улат гын, ончыкто!» акций дене вашлиеш
Марий Эл ВДВ-н кечыжым «Десантник улат гын, ончыкто!» акций дене вашлиеш. Таче Марий Элыште икымше гана парашют дене тӧрштылмылан 85 ий темеш. Тунам, 1935-ше ийыште, Йошкар-Олаште мемнан парашютист- влак икымше областной авиаций пайремыште участвоватленыт. 85 ияш лӱмгечыжым тений Россий ДОСААФ-ын Йошкар-Оласе авиаций да спорт клубшат палемда. 1935-ше ий 15-ше декабрьыште областной комитет Йошкар-Олаште Горькийысе аэроклубын филиалжым ыштыме нерген пунчалым луктын. Тушто лётчик, парашютист да авиамеханик- влакым туныкташ тӱҥалыныт. Республикыштына парашют спорт эре вияҥ толеш. Тымарте тудо шагал огыл спорт мастерым да кандидат- влакым ямдылен, юж-десант войскалан кадрым ямдылыше тӧнеж улеш. ВДВ кече лӱмеш Йошкар-Оласе авиаций да спорт клуб парашют дене тӧрштылмашым эртара. ДОСААФ-ын регионысо пӧлкаже ветеран-десантник- влак деке «Десантник улат гын, ончыкто» ӱжмаш дене лектын ыле. Нуно кумылын ушненыт да Республикын сборный командыжын еҥже да самырык парашютист- влак дене тӧрштылмашым ончыктеныт.
