Марий Элыште утларак ямде улмо режимым 25-ше июль марте шуйымо.
Эртыше суткаште республикыштына эше 27 еҥын коронавирус чержым пеҥгыдемдыме. Тачысе кечылан черланыше- влакын тӱшка чотышт кум тӱжемат 436 еҥыш шуын. Ӱмыр лугыч лийше- влакын чотышт тугаяк: 31 еҥ. Россий мучко тымарте 760 тӱжем еҥын чержым пеҥгыдемдыме. Суткаште куд тӱжемат 406 еҥлан тиде диагнозым шындыме, 7 тӱжемат 600 утла еҥ черым сеҥен лектын, 186 еҥ ӱмыр лугыч лийын. Марий Элыште утларак ямде улмо режимым 25-ше июль марте шуйымо. Таче Республикым вуйлатыше Александр Евстифеев «Санитар-эпидемиологий лӱдыкшыдымылыкым ыштыме мера- влак нерген» Указышкыже вашталтышым пуртен. Тудым Правительствын официальный сайтыштыже вераҥдыме. Документ дене келшышын, санитар-эпидемиологий ситуацийым шотыш налын, утларак ямде улмо режим республике мучко 25-ше июль марте шуялтеш. Республикыштына ончычсо семынак тӱшка, каныме, тӱвыра да моло кугу мероприятий- влакым эртараш ок лий. Тӱшка верлашке дистанцийым эскерен, маскым чиен лекман.
