«Марий шыже» фестиваль почылтын

«Марий шыже» фестиваль почылтын
Йошкар-Олаште теҥгече «Марий шыже» фестиваль тӱналын. Тудо ынде 1980-шо ий годсек эртаралтеш. Фестиваль лӱмлӧ композитор, «Лесная легенда» марий балетын авторжо Анатолий Лупповын 90 ияш лӱмгечыжлан пӧлеклалтше «Сем легенда» концерт дене почылтын. Фестивальым ямдылыше да тушко ушнышо- влакым Марий Элым вуйлатыше Александр Евстифеевын лӱмжӧ дене правительстве председательын икымше алмаштышыже Михаил Васютин саламлен. Республикым вуйлатыше палемден: «Марий шыже» фестиваль тӱвыра календарьыште ик эн волгыдо событий. Тудо шке площадкылашкыже эре шуко калыкым чумыра. Тений тудо республикын 100 ияш лӱмгечыже вашеш да профессионал музыкын легендыже Анатолий Лупповын 90 ияш лӱмгечыже кышкарыште эрта. Анатолий Борисович, те Российысе уста композитор- влакын ик тукымжым веле огыл куштымылан шуко жапым пӧлекленда. «Лесная легенда» балет ятыр ий Эрик Сапаев лӱмеш театрын визитный карточкыжлан шотлалтеш. Анатолий Лупповлан республикым вуйлатышын Указше дене «Марий Эл ончылно надырлан» орденын медальжым кучыктымо.

Прошлые выпуски