Марий АССР-ыште Волжский оборонительный рубежым чоҥымо нерген книгам савыктен лукмо
Марий АССР-ыште Волжский оборонительный рубежым чоҥымо нерген книгам савыктен лукмо. Ольга Кошкинан Марий АСССР-ысе калыкын 1941-1942-шо ийласе паша подвигше нерген «Негромкий подвиг: Волжский оборонительный рубеж на территории Марийской АССР в 1941-1942 годах» шанче да популяр савыктышыже лектын.1941-ше ийын октябрьыште тушманын чот наступатлымыже годым Кугыжаныш обороно комитет Юл кундемыште оборонительный рубеж- влакым чоҥаш решенийым луктын. Тудо Озаҥ, Куйбышев да Ульяновск декыла немыч войска каен ынже керт манын ышталтын. Марий АССР кундемыште СССР оборона наркоматын 11-ше Армий виктемжылан чоҥаш пуымо. Рубежын кужытшо шӱдӧ меҥге лийын. Тудым чоҥаш Звенигово да Курык марий районлаште кок военно-полевой чоҥымашым ыштыме. Пашаште кажне кечын коло тӱжем наре еҥ тыршен. Нуно кӱчык жапыште- 30 суткаште- танк ваштареш коремым, эскарпым, окопым, дзотым, блиндажым да пушеҥгым сӱмыркален оборона линийым ыштышаш улыт ыле. Книгашке сӱрет- влакым, архив документлам, фотосӱретым, схемым, картым пуртымо.
Фото: Георгий Коновалов / ТАСС\ «Кидшер»
